Is 100 annos de su Nobel a Gràtzia Deledda

Is 100 annos de su Nobel a Gràtzia Deledda

Ocannu chi benit amus a afestare is 100 annos de su Prèmiu Nobel a Gràtzia Deledda, ùnica fèmina sarda e italiana chi dd’at retzidu in su campu de sa Literadura. Giai dae unos cantos meses sunt comintzadas is fainas pro regordare custu anniversàriu, ma est in custas dies chi entes, universidades, istitutos sunt boghende a campu is programmas chi nos ant a acumpangiare in totu su 2026. Comente a su de s’I.S.R.E. (Istitutu Superiore Regionale Etnogràficu) de Nùgoro chi, pro s’Annu Deleddianu, at pensadu a una filera de mustras, addòbios, seminàrios e publicatziones in Sardigna, in Nùgoro e in is Universidades de Casteddu e de Tàtari, ma fintzas in Catània, Roma, Stoccolma e New York. Su programma dd’ant presentadu su presidente Stefano Lavra e Dino Manca, professore de Filologia de sa literadura italiana in s’Universidade de Tàtari e chi faghet parte de su Comitadu tècnicu-iscientìficu de s’I.S.R.E. e de su Tzentru pro is istùdios in contu de s’iscritora nugoresa.

Su prèmiu fiat pro s’annu 1926 ma, sigomente Deledda dd’aiat retzidu su 10 de nadale de su 1927, si comintzat cun una mustra de is lìteras intra de s’iscritora e Vincenzo Jerace, s’iscultore calabresu chi aiat fatu s’istàtua de Cristus Redentore chi s’agatat in su cùcuru de su Monte Ortobene. Sa mustra dd’ant aberta martis 9 de nadale in sa domo anca est nàschida Deledda. Mèrcuris 10, imbetzes, ant presentadu su primu nùmeru de Gràtzia. Bulletinu de istùdios deleddianos. Ma in totu su 2026, a prus de s’essida de àteros Bulletinos, si prevident addòbios cun is istudiantes de is iscolas sardas, una collaboratzione cun sa Biblioteca Natzionale Tzentrale de Roma e addòbios de regordu in is Istitutos italianos de Cultura de Stoccolma e de New York.

In su mese de nadale de su 2026 amus a fàghere in Nùgoro su cunvegnu de serrada de s’Annu Deleddianu, ant naradu Stefano Lavra e Dino Manca, ma apoderende artu semper s’atentu pro is fainas literàrias de s’iscritora nostra, chirchende de nd’afortiare sa presèntzia in is programmas de literadura de s’iscola italiana, in ue est ancoras pagu presente.

Faina fatta cun s’agiudu de sa Regione Sardigna Avisu IMPRENTAS – L.R. 22/2018, art. 22

A cura di Antoni Nàtziu Garau